* वृक्षरोपण

रक्तदान शिबिरानंतर भंडारी मंडळाने पुढचे सामाजिक कार्य केले ते म्हणजे संजय गांधी राष्ट्रिय उद्यान (नॅशनल पार्क) - बोरीवली मध्ये वृक्षरोपण.

नॅशनल पार्क मधील ग्राउंड ऑफिसर श्री. भारती ह्यांच्या म्हणण्याप्रमाणे

१. नॅशनल पार्क वृक्षरोपनासाठी जागा उपलब्ध करून देते.

२. त्यासाठी रजिस्टर्ड क्लब हवाच असे नाही.

३. वृक्षरोपणाची माहिती देण्यासाठी त्यांच्या तर्फे सहकारी दिला जाईल.

४. या कामासाठी कोणत्याही प्रकारे पैसे आकारले जाणार नाहीत.

५. वृक्षरोपण हे एका दिवसात होऊ शकत नाही. उन्हाळा चालू असल्यामुळे आता झाडे लावण्यासाठी खडडे करावे, त्यामुळे मातीतील बुरशीचा नाश होईल असे त्यांचे मत होते.

६. पाउस सुरु झाला की झाड लावणे योग्य.

७. लिखित अनुमतीसाठी एक अनुमति पत्र प्रथम द्यावे लागते. या पत्रामधे आपल्या कम्युनिटीच्या माहिती बरोबरच झाडे किती लावणार? कोणती लावणार? सर्वसाधारण किती व्यक्ति सहभागी होणार? आपल्याला उद्यानाकडून कोणती मदत अपेक्षित आहे? नमूद करणे आवश्यक आहे.

८. नेशनल पार्क नर्सरीमधे फक्त शोभेची झाडे आहेत. त्यामुळे बाहेरून झाडे विकत आणावीत.

९. झाडाच्या देखभालीसाठी मंडळाचे सदस्य वरचे वर भेट देऊ शकतात.

                त्यामुळे आमचा वृक्षरोपण हा कार्यक्रम दोन टप्प्यात पार पाडण्याचे ठरले. त्यासाठी नॅशनल पार्कच्या अधिकाऱ्यांकडून ह्या कामासाठी लिखित अनुमती पत्र हि आम्ही आधीच घेवून ठेवले. ठरल्याप्रमाणे दिनांक ३१ मे २००९ रोजी नॅशनल पार्क मध्ये जावून झाडांसाठी खड्डे खणण्यात आले आणि दिनांक २८ जून २००९ रोजी झाडे लावण्यात आली त्याची थोडक्यात माहिती पुढीलप्रमाणे आहे.

१. दिनांक ३१ मे २००९ रोजी नँशनल पार्क मध्ये जावून झाडांसाठी खडडे खणणे :

                 नॅशनल पार्क च्या गेट वर सकाळी ९ च्या आसपास भंडारी मंडळाचे ३० सभासद जमा झाले. वृक्षरोपणाचे आमचे ठिकाण लांब असल्यामुळे काही सभासदांच्या बाईक वरून, काही पायी असा आमचा प्रवास सुरु झाला. जागेवर पोचल्यावर सगळ्यांनी आधी सकाळची न्याहारी करून घेतली. कामाला सुरुवात करण्याआधी गाऱ्हाणे घालून मग नारळ फोडण्यात आला आणि अश्याप्रकारे झाडांसाठी खडडे खणण्याच्या आमच्या कामाला सुरुवात झाली. ३० सभासदांची ५ विभागात गटवारी करण्यात आली. त्यानंतर किती खडडे खोदावे, कसे, कुठल्या मापाचे हा विचार करण्यात आला. जवळ जवळ २० खडडे खोदल्यानंतर आम्ही दुपारच्या जेवणासाठी थोडी विश्रांती घेतली आणि मग पुन्हा कामाला सुरुवात केली. कडक उन्हाने तापलेली जमीन आणि त्यात जास्त दगडी असल्यामुळे खडडे खणताना आमची खूपच दमछाक झाली. पण तरीही आमचा कामाचा उत्साह उदंड होता. बघता बघता आम्ही सर्वानी मिळून त्यादिवशी एकूण २५ खडडे खोदले.

२. दिनांक २८ जून २००९ रोजी झाडे लावणे :

                 भंडारी मंडळाच्या काही सदस्यांनी नर्सरीतून २५ झाडे आणि काही प्रमाणात खत आदल्या दिवशीच नॅशनल पार्क मध्ये आणून ठेवली होती. ठरल्याप्रमाणे सगळी मंडळी जमा झाली आणि आमचा प्रवास सुरु झाला आमच्या वृक्षरोपणाच्या ठिकाणी. आधी न्याहारी करून मग आमची कामाला सुरुवात झाली. खडडे आधीच खणून तयार असल्यामुळे सर्वानी ग्रुप बनवून पटापट झाडे लावण्याचे काम केले. सर्व झाडे लावून झाल्यावर आम्ही केलेल्या कामाची पावती म्हणून बहुतेक पावसाने हि नेमकी त्या दिवशी हजेरी लावली आणि आम्ही लावलेल्या झाडांना पाणी देण्याचे काम केले. निसर्ग त्यादिवशी आमच्यावर खूपच खुष होता बहुतेक. आम्ही सर्वजन नॅशनल पार्क च्या गेट वर परतत असताना हरीणांचा कळप नजरेस पडला आणि आमच्या सर्वांच्या डोळ्यांचे पारणे फिटले.

वृक्षरोपणाचे फायदे :

                 निसर्ग बदलत नसतो, बदलते ती माणसाची जीवनशैली. पुढील काही वर्षांतच आपल्याला याचे परिणाम भोगावे लागणार आहेत व त्याची नांदी सुरू झाली आहे; कारण गेल्या वर्षी महाराष्ट्रात पडलेली कडाक्याची थंडी, या मार्च महिन्यातील बिगर मोसमी पाऊस वगैरे. यासाठी आपल्या साध्या सवयीनेही बदल घडू शकतो. आपल्याच वाढदिवसाला एक झाड लावणे व त्याचे संवर्धन करणे. त्याचे फायदेही मिळतील. जमिनीची धूप थांबेल. पक्ष्यांना निवारा मिळेल व फळा-फुलांनी बहरलेले झाड बघण्याचा आनंद मिळेल आणि आपण नकळत सामाजिक जबाबदारी पार पाडल्याचे समाधान हि मिळेल.

                 तर मंडळी तुम्ही हि एक तरी झाड लावाल ना?