नमस्कार,
भंडारी मंडळामध्ये आपले स्वागत आहे. सर्व भंडारी बांधवांना एकत्र आणून एकमेकांना मदत करून एक नवे नाते जोडण्याचा आमचा हा छोटासा प्रयत्न आहे....!!
मूलत: आम्ही एकत्र आलो ऑरकुटच्या माध्यमातून, भंडारी मंडळ कम्युनिटीच्या सूत्रधार स्वाती पेडणेकर हिच्या प्रयत्नाने आमच्या एकत्र येण्याला एक अर्थपूर्ण दिशा मिळाली ती म्हणजे करमणुकीच्या कार्यक्रमासोबत सामाजिक कार्यात हातभार लावण्याची. बरयाचदा आपण एकत्र येतो, गजाली पिटतो, थोडा वेळ जगभरातल्या गप्पा मारतो आणि परत आप-आपल्या विश्वात रमून जातो आणि काही वेळाने त्या गप्पांचे विस्मरणही होते, ते मित्र हि लुप्त होतात काळाच्या पडद्याआड. अचानक काहीतरी दिव्य असे होते अन ओर्कुटचा जन्म होतो. आपण शोधू लागतो आपल्या हरवलेल्या सवंगड्यान्ना, सभासद बनतो अश्या कम्युनिटीचे ज्यांच्याशी आपण निगडीत आहोत, आपली ओळख आहे, ज्या विषयात आपली आवड आहे.
याच विचारातून स्वाती पेडणेकर हिने १५ एप्रिल,२००६ रोजी भंडारी मंडळ कम्युनिटी ऑरकुटवर नोंदवली. एक-एक सभासद वाढत गेला. सगळेच तसे अनोळखी पण त्यांना बांधले गेले होते भंडारी या नावाने. हरहुन्नरी, निडर, बेडर, कोषागार भंडारी... धाडसी, दर्याचे राजे, दर्यादिल भंडारी...प्रत्येक भंडारी अभिमानाने कम्युनिटीचा सभासद बनू लागला, एक एक धागा विणत गेला.
कम्युनिटीमध्ये हळूहळू फोरम वाढत गेले. गेम्स वाढत गेले. सगळे एकमेकांच्या संपर्कात यायला लागले, स्क्रेप करू लागले. असेच एके दिवशी स्वाती पेडणेकर, अमित पडवळ, चित्राली शिवलकर, अलोक मयेकर, योगीश बारसकर आणि अविनाश वायगंणकर यांना एक कल्पना सुचली, कम्युनिटीच्या पहिल्या स्नेहसंमेलनाची. सगळ्यांना एकत्र आणून मदत करण्याची संकल्पना, ओर्कुटच्या अनोळखी चेहऱ्याला वास्तवात आणण्याची संकल्पना.
